Malia o estado de crise, restricións e parón empresarial e social, proseguen finalmente as obras da nova sede do Club de Remo Cabo de Cruz, uns traballos que se están a desenvolver coas debidas normas de protección sanitaria e que, segundo informou o Concello de Boiro, son posíbeis novamente grazas á retirada do pau da luz que impedía o desenvolvemento do proxecto. O Goberno local tamén explica que a retirada do poste, propiedade da eléctrica Naturgy, “incumpriuse en varias ocasións”, o que rematou por adiar a execución das obras, interferindo nas mesmas.
Agora estase a traballar no noiro de terra inestábel da zona sur da obra, como paso previo para a continuación dos traballos principais. O Concello engade que nas vindeiras semanas comezarase coa cimentación do foso de remo e tamén coa cimentación e posterior execución dos muros pantalla de formigón que serán o limite da nova construción polo centro sur.
A previsión actual, e “en condicións de traballo normais”, é que no mes de abril estea totalmente rematada a cimentación, os muros de contención e os fosos de remo. Logo colocarase a estrutura e o peche prefabricado que dará forma ao inmóbel e que debería chegar a partir do día 20 de abril.
