O BNG boirense anunciou esta mañá as súas propostas para o orzamento municipal de Boiro para o 2020. Acompañada por Xosé Deira, Carlos Ansoar e Santos Saborido, a voceira da formación nacionalista local, Raquel Suárez, explicou que as iniciativas se clasifican en catro grandes bloques.
Así, no de servizos sociais enmárcase o inicio de trámites para o estudo da mellor localización da Residencia da Terceira Idade, pois a concelleira nacionalista manifestou que “é moi necesaria no noso concello”; así como unha partida para vivendas sociais ao estar Boiro adherido ao Programa de Vivendas Baleiras da Xunta de Galicia despois da aprobación da moción presentada polo Bloque na anterior lexislatura.
No eido da cultura, solicitan unha partida para a rehabilitación do pazo de Goiáns, converténdoo “nun referente cultural, turístico, un reclamo para o noso municipio e iso tamén redunda na economía”; o acondicionamento e dotación, tanto de persoal coma de material, para o Centro Social de Abanqueiro; e a apertura de Radio Boiro, xa que “é unha canle de participación veciñal, un instrumento tamén de pluralidade e un medio público que tiñamos no noso municipio.”
Respecto á dotación de servizos, recóllese a apertura do aparcadoiro de A Negral; a dotación de zona de estacionamento para vehículos de dúas rodas; un equipo para a erradicación da avespa velutina en altura; a municipalización do complexo deportivo de A Cachada; e o arranxo da estrada Redullo-Ameán.
En canto ao bloque de medio ambiente, requiren unha mellora do servizo do lixo e a introdución do modelo de compostaxe, o cal “favorecería o medio ambiente e reduciría a factura que hai que pagar a SOGAMA.”
