A vixésimo primeira edición das Xornadas de Homenaxe a Valle-Inclán continúan ao longo desta fin de semana na Pobra do Caramiñal. Así, o eido literario estará marcado pola presentación, da man da Asociación Cultural Barbantia, de Consolación a Marcia; Consolación a Helvia, unha tradución do latín ao galego asinada por María Isabel Santos Davila. A cita terá lugar nesta mesma xornada, venres 25, ás 20.30 horas, no Auditorio do Museo Valle-Inclán.
Tamén haberá música a cargo de Barahúnda, que dará a coñecer, o sábado 26, o seu novo disco Onde vai o mar?, acto no que farán referencia ao escritor homenaxeado e que se celebrará no Elma, ás 20.30 horas.
Por outra banda, o apartado teatral desenvolverase no Elma, ás 20.00 horas, con Teatro del Norte, que será o encargado de escenificar, o domingo 27, Retablo de la Avaricia, la Lujuria y la Muerte.
