20191015. Unha vez remate o I Ciclo Victoriano García Martí o 20 de outubro, A Pobra do Caramiñal volverá a converterse nun fervedoiro cultural con motivo da vixésimo primeira edición das Xornadas de Homenaxe a Valle-Inclán. O programa deste evento está composto por un amplo abano de actividades para tódolos públicos que se desenvolverán desde o 23 de outubro ao 30 de novembro, incluíndo teatro, concertos, ofrenda cívica ou conferencias, entre outros. A sala de exposicións do Museo Valle-Inclán acolleu esta mañá a presentación, á cal asistiron o alcalde Xosé Lois Piñeiro; a concelleira de Cultura, Patricia Lojo; o director xeral de Políticas Culturais, Anxo M. Lorenzo; e o director do Museo, Antonio González.
O apartado teatral desenvolverase no Elma. Cachirulo Teatro representará o 23 e 24 de outubro a obra Farsa italiana da namorada do rei, adaptación do texto de Valle-Inclán destinada aos escolares. Teatro del Norte será o encargado de escenificar o 27 de outubro Retablo de la Avaricia, la Lujuria y la Muerte. Os artistas pobrenses Roberto Leal e Gemma do Carmo percorrerán as salas do Museo Valle-Inclán o 31 de outubro para interpretar Ambitus amoenus: De teatro nunha Torre con alma de artista. A Compañía Tatana Teatro levará a escena o 3 de novembro a obra Memorias da Árbore da Noite Triste: Último acto de Valle-Inclán.
O eido literario celebrarase no Auditorio do Museo Valle-Inclán, comezando o 25 de outubro da man da Asociación Cultural Barbantia coa presentación de Consolación a Marcia, unha tradución do latín ao galego asinada por María Isabel Santos Davila. Como en edicións pasadas, o 31 de outubro verán a luz os números 37 e 38 da revista Cuadrante. O 30 de novembro amosarase O meu bisavó, a primeira curta en galego e ilustrada de Ramón del Valle-Inclán, entregándoselle exemplares ao público.
Tamén haberá música da man de Barahúnda, que dará a coñecer, o 26 de outubro, o seu novo disco Onde vai o mar?, acto no que farán referencia ao escritor homenaxeado.
Ademais, o 30 de outubro haberá ofrenda cívica nos xardíns Valle-Inclán, amenizada polo grupo de música tradicional Os Caraveiros e que inclúe ofrenda floral fronte ao busto do autor, chantado da camelia xapónica creada por Begoña Franco en honor ao intelectual e lectura pública de textos seus nos que alude a esta especie botánica.
Así mesmo, o Auditorio do Museo Valle-Inclán albergará o 22 de novembro o parladoiro Ramón del Valle-Inclán e familia no casal da Mercé, con proxección de imaxes inéditas. Contará coa intervención de Xaquín del Valle-Inclán Alsina, descendente directo do escritor e investigador. Os asistentes serán agasallados coa reprodución numerada e asinada dunha ilustración de Héitor Picallo, creada especialmente para estas xornadas, tratándose dunha edición limitada a 150 exemplares.
Por outra banda, terá lugar a exposición Borranchos. Aproximación á obra de Valle-Inclán no Teatro Auditorio Valle-Inclán de Vilanova de Arousa -do 18 de outubro ao 3 de novembro- e no Museo Fundación E. Granell de Santiago de Compostela -do 7 de novembro ao 1 de decembro-.
A edil Patricia Lojo indicou que estas xornadas están promovidas pola Dirección Xeral de Políticas Culturais da Xunta de Galicia e polo Concello da Pobra do Caramiñal, así como organizadas polo Museo Valle-Inclán. Deste xeito, manifestou que estas actividades destacan pola posta en valor da figura do creador galego, o traballo da Casa-Museo que dinamiza a súa memoria e obras literarias e a “suma da concorrencia de cooperacións que testemuñan o aprecio social que teñen estas xornadas, que van dende as administracións e institución públicas, entidades académicas e asociacións culturais.”
O director do Museo Valle-Inclán pobrense, Antonio González, precisou que moitas das actividades se centrarán na fin de semana co obxectivo de facilitar a asistencia das persoas a cada un dos eventos organizados. No que respecta á revista Cuadrante, sinalou que “son números especialmente interesantes para os veciños de Arousa e, xa que estamos na Pobra, tamén un guiño cara o Barbanza. Son uns monográficos a Valle-Inclán e a Josefina Blanco con documentación que os sitúa nestas terras.”
Na súa intervención, o director xeral de Políticas Culturais, Anxo M. Lorenzo, recoñeceu o labor do Concello pobrense e do Museo Valle-Inclán, felicitándoos pola programación deste ano, así como polo I Ciclo Victoriano García Martí. O representante desta área da Xunta destacou “a diversidade de propostas” e fixo fincapé en tres cuestións: a ofrenda cívica; a participación de Xaquín del Valle-Inclán Alsina supoñendo “un valor engadido”; e a revista Cuadrante “de enorme calidade e, sobre todo, de enorme orixinalidade.” Aproveitou para lembrar as obras que se están realizando no Auditorio nunha colaboración entre a Xunta, Concello e Museo, as cales “agardemos antes de fin de ano poder inauguralas e que todo o mundo vexa a mellora.”
Finalmente, o rexedor Xosé Lois Piñeiro apuntou que o último acto do I Ciclo Victoriano García Martí, o cal se corresponde coa obra de teatro Don Severo Carballo. Del alma gallega, que se escenificará o 20 de outubro, supón “un punto de conexión” entre os dous eventos e os dous autores. Da mesma maneira, expresou o seu agradecemento a tódalas persoas e entidades que fixeron posible estas xornadas.
