20191014. Con motivo da terceira edición da Andaina Solidaria contra o cancro de mama que se celebrará en Boiro o domingo 20 con xa 2.000 inscritos, a Asociación Boirense de Empresarios (ABE) manifesta que colaborará coa causa tratando de dar visibilidade a través dos escaparates dos establecementos asociados, podendo participar calquera sector.
Desta maneira, o obxectivo é conseguir que, entre o 14 e o 20 de outubro, os escaparates vistan de rosa. No que respecta á decoración, os participantes teñen total liberdade e a ABE tamén porá a disposición un cartel informativo da iniciativa que se pode recoller na sede ou descargalo da páxina web www.abe.gal.
Unha vez ataviados os establecementos, poderase subir unha foto ás redes sociais co hashtag #andainarosaboiro ou etiquetar a @cimadevilasaude ou @boiroaberto para que se difunda.
Así mesmo, a ABE propón que, durante as xornadas do sábado 19 e o domingo 20 -este día a hostalería-, os participantes atendan á clientela vestindo a camiseta rosa oficial do evento.
