A comarca únese hoxe á Folga Mundial Polo Clima

27 Setembro 2019

20190927 Este 27 de setembro organízase a nivel mundial un evento que pon o foco na necesidade de poñernos a traballar a prol do planeta: esixindo ás entidades e empresas mundiais que se mollen de verdade pola Terra e, tamén, aplicando medidas de sustentabilidade no noso día a día (por exemplo apostando por medios de transporte limpos e/ou públicos ou reducindo o volume de plásticos que carrexamos para o fogar). Todo isto vén a conto para lembrar que hoxe, apoiada por máis de 1.600 convocatorias mundiais, celébrase a #FolgaMundialPoloClima.

A mobilización internacional está a ter repercusión na nosa comarca, con actividades na Pobra (unha cadea humana na praia dos Areos, unha recollida de lixo no río Pedras e unha concentración ás 20.30 horas no Cantón da Leña) e máis en Rianxo (contacontos, charlas e unha concentración pola emerxencia climática, hoxe, na praza de Padrón).

Ao programa de actividades dos devanditos concellos únese tamén o de Lousame, cuxas entidades ambientais celebran mañá en Froxán a recuperación dunha turbeira drenada polos Servizos Forestais nos anos 1970 na Área Conservada pola Comunidade Veciñal de Froxán e eliminando eucaliptos en toda a súa contorna. A actuación comezará ás 9:30 e rematará ás 14:00, cun xantar de albaroque ofrecido polas entidades anfitrioas de Montescola e a Comunidade Veciñal de Froxán.

Segundo nos conta Verdegaia, unha das plataformas que máis está a traballar pola folga deste 27 de setembro na nosa terra, a listaxe de entidades galegas que se uniron ao Movemento Galego polo Clima está formada por medio cento de colectivos, plataformas e asociacións, todas elas unidas baixo o obxectivo común de defender o futuro dun planeta vivo e dun mundo máis xusto.

O Movemento Galego polo Clima: as orixes

O Movemento Galego polo Clima xorde en Galiza como resposta á convocatoria de mobilización mundial feita polo movemento xuvenil Fridays For Future (Venres por Un Futuro) para este 27 de setembro, co obxectivo de saír á rúa a reclamar accións urxentes que fagan fronte á mudanza climática e que garantan un futuro para as xeracións máis novas.

O Movemento Galego polo Clima está conformado por unhas 50 entidades e colectivos galegos que apoian o chamado de acción da xente nova ante a situación de Emerxencia Climática que vive o planeta enteiro, e particularmente a nosa terra. “É por iso que temos intención de afrontar este reto tendo presente cales son as causas que máis están alentando o quecemento global no noso país e cales son as medidas que poderían evitar as consecuencias drásticas para o noso territorio e para o pobo galego no seu conxunto”, sinalan dende Verdegaia, en cuxas vertentes web (no Facebook de seu e no blogue do Movemento) podemos seguir de preto toda a información sobre as diferentes mobilizacións.

Outros artigos

Ambar organiza unhas xornadas deemprego en Ribeira e Rianxo

A Asociación Ambar das Persoas con Diversidade Funcional organiza este mes de xuño unha actividade para romper barreiras en materia de emprego e igualdade: as Xornadas de Emprego dirixidas a mulleres con diversidade funcional. Desenvolveranse nos concellos de Ribeira...

+

Martes con sol e lixeira baixa das temperaturas

O martes o anticiclón retírase cara ao oeste, polo que se irá perdendo o réxime de ventos do nordés e entrarán ventos máis húmidos de compoñente oeste. Asi comezaremos a xornada cos ceos pouco nubrados ou despexados. A partir do mediodía entrarán as brétemas costeiras...

+

Publicidade

Revista en papel

Opinión

“Auditorio” – José Manuel Pena

“Auditorio” – José Manuel Pena

Xa é unha grata realidade, o novo auditorio. Ribeira, necesitaba un auditorio en condicións e adecuado ao seu número de habitantes e da importante poboación da propia comarca do Barbanza. Este pasado sábado chegouse a inaugurar oficialmente, coa presenza de diferentes...