20190925 Estes días estase a celebrar a nivel mundial a Semana de Acción polo Clima, unha fronte común e sen fronteiras que acompaña Folga Mundial contra o Cambio Climático, o 27 de setembro. En que se traduce isto? Pois en milleiros de actividades de toda índole en diferentes parte do mundo e cun obxectivo común: instar ás entidades públicas e ás empresas de todo o mundo a que fagan algo de verdade para pór freo as catástrofes ecolóxicas derivadas do quecemento da Terra. A #semanapoloclima tamén vai ter repercusión na nosa comarca, voces que se van sumar ao berro mundial, como a do Concello da Pobra (tal e como lembramos os días pasados) ou as de diversas asociacións rianxeiras que organizan, tamén, un completo programa de accións reivindicativas e de divulgación.
A Semana polo Clima de Rianxo conta co impulso da ANPA do CRA Irmáns Insua, de Fousas ao Monte, da Plataforma pola Defensa do Monte, de Ondiñas Mainas e de Nosa Enerxía.
As actividades comezaron onte, cun contacontos da Plataforma Pola Defensa do Monte, na Biblioteca de Daniel en Asados, e proseguen o venres 27 cunha charla da cooperativa de enerxías renovábeis A Nosa Enerxía, que se celebra no Auditorio de Rianxo e na que se fará un percorrido pola actividade da entidade (un proxecto que xorde na nosa terra para apostar de cheo por un novo modelo de xestión enerxética, onde os recursos sustentábeis e eficientes, a promoción da economía local e a transparencia xoguen un papel fundamental). Na mesma xornada do 27, cumio das mobilizacións, celebrarase unha concentración pola emerxencia climática na praza de Padrón, coa presenza dos colectivos Fousas ao Monte e a Plataforma pola Defensa do Monte.
Xa ao día seguinte, o sábado 28, desenvolverase unha xincana medioambiental da man de Ondiñas Mainas, no paseo da praia da Torre. O colectivo Ondiñas Mainas, para quen non o saiba, é unha asociación cultural con base en Rianxo que busca poñer en valor os xeitos tradicionais de traballar e crear e contribuír a dinamizar a vida cultural e social do concello.
