O Auditorio de Rianxo vai acoller o vindeiro 10 de maio, venres, a estrea na nosa comarca de Vía Morta, de Culturactiva e Pallasos en Rebeldía, co apoio do Concello.
Será ás 21.00 horas do venres 10, na Sala Arcos Moldes, con reserva previa a través de formulario ou no teléfono 981 100 688. A sesión, que será de balde, é unha peza escénica para público adulto (de máis de 16 anos) que pretende ser, máis que un espectáculo teatral, “unha experiencia a través do teatro, unha montaxe teatral que pretende traer a realidade dos refuxiados e refuxiadas ao público de Galicia a través dunha proposta que converte ao espectador nun refuxiado máis”. A obra denuncia a traxedia que as políticas migratorias da UE están a provocar. Segundo explican dende Pallasos en Rebeldía, “o teatro non pode ficar impasíbel ante a deliberada política de esquecemento á que as persoas refuxiadas son hoxe sometidas”. Este espectáculo fálanos sobre a triste situación dos millóns de refuxiados e refuxiadas aos que, aínda hoxe, a Unión Europea pecha as súas portas.
