Despois de tantos anos de período democrático e de liberdades en España, queda de manifesto que o espírito da transición durou o xusto e necesario para que se producise unha amnistía xeral de todos os crimes cometidos durante as catro décadas da ditadura militar franquista. Personaxes e individuos, con poder no réxime anterior, tiveron a oportunidade de poder engrosar as listas electorais dalgúns partidos políticos para presentarse a unhas eleccións, despois do “borrón e conta nova”. Na actualidade continúan os pasos dos seus antepasados os seus fillos e netos, estrañando aqueles tempos escuros da nación española.
Hai anos en que, o noso país vive refén dos poderes mediáticos, empresariais e xudiciais amparados por forzas políticas da dereita radical e da extrema dereita. Todo está xustificado para atacar ao adversario político. Trolas, falsidades, mentiras, acoso, denuncias falsas e imputacións sen ningún tipo de percorrido xudicial. Todo está controlado polo odio e o rancor dos que non teñen o poder para seguir crendo que España é súa, dos seus familiares e amigos, o resto son escoura, populistas, parias e marxinados sociais.
Escoitar, ler ou ver, nalgunhas emisor de radio, xornal ou televisión, é habitual atoparse con determinadas noticias falsas e partidistas que están á orde do día. Estes medios, chamados “xornalísticos”, serven á voz dos seus amos, que os sufragan economicamente con diñeiro manchado de sangue, do narcotráfico ou das mafias do crime organizado.
Controlando a certos medios de comunicación e a determinados membros do poder xudicial, queren decidir o futuro do país. Para eles, o fin xustifica os medios. Actuaron, atacando e destruído ao partido político de Podemos e a moitos dos seus líderes así como a membros doutras formacións políticas, estamentos sociais e xudiciais contrarios aos seus intereses. Sen ruborizarse, continúan coas súas estratexias kafkianas, porque se aproveitan do pasotismo político da maioría da sociedade civil.