20190826 As celebracións dos 1.100 anos da parroquia de Corrubedo que se están a levar a cabo este ano na vila mariñeira culminaron este domingo cun macro-xantar veciñal na explanada do porto, no que a confraternidade, a boa comida (dúas grandes paelleiras de tamaño acorde co número de comensais) e a música (a banda de gaitas e baile Tahúme, o DJ Magic Mendes) foron protagonistas e no que participaron arredor de 350 persoas (superándose todas as expectativas de participación, mesmo as máis optimistas no que a presenza de veciños e visitantes se refire).
O xantar, no que tamén foi protagonista a historia en imaxes de Corrubedo (o material audiovisual de Maxi Franco, Montserrat Gutiérrez e Francisco Sánchez Fraga: un percorrido pola apaixonante historia da vila, rica en interesantes acontecementos ligados ao mar, e tamén aos traballos da terra), foi organizado pola Asociación Corrubedo Once Séculos. No seu transcurso, o colectivo local entregou os agasallos a todas as persoas e entidades que colaboraron na materialización do evento e nas restantes actividades conmemorativas que se desenvolveron ao longo do ano.
Actividades como por exemplo a conferencia co historiador Francisco Sánchez Fraga, a viaxe ás décadas pasadas de Corrubedo que achegou o arquiveiro municipal de Ribeira, José Antonio Otero Sobrido, a carreira popular Corrubedo Once Séculos ou as festividades da patroa, o 15 agosto.
