O historiador Francisco Sánchez Fraga pecha o círculo de conferencias sobre Corrubedo

15 Xullo 2019

20190715. Un total de 250 incidentes marítimos graves acaecidos entre Sálvora e Basoñas e, de resultas dos mesmos, 1.494 persoas falecidas é o que ten contabilizado o historiador Francisco Sánchez Fraga no entorno de cabo Corrubedo e así o referiu a pasada fin de semana durante a última das catro conferencias que, a iniciativa da asociación Corrubedo XI Séculos e coa colaboración do Concello de Ribeira, tiveron lugar na casa do mar da parroquia.

Baixo o título de Lo que aprendí de Corrubedo, o conferenciante –autor de libros como Santa María del Cabo de Corrubedo (y coto del mismo nombre) ou Corrubedo en verso y prosa— deu a coñecer abundantes datos acerca deste territorio desde tempos remotos ata o pasado máis inmediato.

Así, ante un público que volveu encher un venres máis a casa do mar, a súa intervención incidiu en temas tales como os petróglifos do Outeiro de Santiaguiño, os lindes históricos do coto de Corrubedo ou o documento no que se fai referencia á doazón da parroquia polo rei Ordoño II ao mosteiro de San Paio de Antealtares no ano 919, documento que está a motivar a conmemoración destes once séculos.

Unha parte da súa exposición estivo dedicada aos naufraxios, pois Sánchez Fraga exerceu durante a súa vida profesional como integrante do Grupo Especial de Actividades Subacuáticas (GEAS) da Garda Civil. O orador matizou que os 250 incidentes marítimos con 1.494 persoas mortas é o que el ten rexistrado pero que de seguro houbo moitas máis que se descoñecen. Como maiores traxedias na contorna citou os afundimentos do Captain (482 mortos), o Santa Isabel (213), o Friesland (144), o Dom Pedro (89) e o Salier (279).

A última parte da charla centrouse no que aprendeu a partir de conversas cos mariñeiros máis veteranos do pobo, nas que saíron a luz antigos homes de mar xa falecidos coma tío Juan Franco (co que se enrolaron por primeira vez moitos veciños a bordo da súa dorna María) ou José Romay Ageitos.

Sánchez Fraga non quixo finalizar sen mencionar dúas vías de investigación que ao seu xuízo merecen ser exploradas por alguén e incluso plasmadas en sendas novelas: unha ten que ver coas mulleres do pobo ao longo da historia e a outra co entramado de amizades e relacións de parentesco que de maneira solidaria se foron axudando uns aos outros nas súas respectivas carreiras profesionais ata o punto de que un número elevadísimo de habitantes alcanzaron o máximo nivel en forma de armadores ou patróns de pesca nos máis importantes portos pesqueiros da xeografía española.

Finalmente, foi agasallado co obsequio institucional da asociación organizadora, consistente nunha réplica dunha das pedras que marcaban os lindes do antigo coto de Corrubedo. Este mesmo regalo que foi entregado á nova presidenta do Club de Xubilados da parroquia, Estrella Franco; e ao artesán que fixo este agasallo, Manuel Olveira.

Outros artigos

O Concello de Ribeira reforza o alumeado público na rúa de Galicia

O Concello de Ribeira informou dun reforzamento do alumeado público nalgunhas contornas do centro urbano da cidade, concretamente no treito da rúa Galicia comprendido entre o Mercado Municipal e o cruzamento co Parque García Bayón. Segundo informaron fontes do...

+

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...