A Xunta de Galicia reforzará en 2026 a súa aposta pola formación marítimo-pesqueira cun investimento superior aos 4,3 millóns de euros, a cifra máis elevada dos últimos exercicios e un 27,77 % máis que no ano anterior. Así o anunciou a directora xeral de Desenvolvemento Pesqueiro, Ángeles V. Suárez, durante a súa comparecencia na Comisión de Pesca do Parlamento galego.
A responsable autonómica destacou que a formación constitúe unha ferramenta estratéxica para garantir o relevo xeracional, mellorar a cualificación profesional e incrementar a competitividade da cadea mar-industria. Neste sentido, subliñou a importancia da colaboración entre a Administración autonómica e as confrarías, organizacións de produtores, cooperativas e asociacións profesionais para adaptar a oferta formativa ás necesidades reais do sector.
Segundo explicou, esta coordinación permitiu responder con rapidez a situacións excepcionais como a elevada demanda rexistrada a finais de 2025 para a renovación da Formación Sanitaria Inicial, unha certificación obrigatoria para embarcar. A Xunta mobilizou os recursos das escolas náutico-pesqueiras e das entidades colaboradoras para evitar que profesionais do mar quedasen sen exercer por falta desta acreditación.
Unha rede formativa de referencia
Galicia conta cunha das redes públicas de formación marítimo-pesqueira máis completas de Europa, integrada polo Instituto Politécnico Marítimo-Pesqueiro do Atlántico de Vigo, as escolas oficiais náutico-pesqueiras de Ribeira e Ferrol e o Instituto Galego de Formación en Acuicultura (Igafa).
No curso actual, estes centros suman 474 estudantes matriculados en ciclos relacionados co sector marítimo-pesqueiro. Desde o ano 2000 rexistráronse máis de 11.300 matrículas e centos de profesionais tituláronse como patróns e mecánicos navais. Ademais, durante 2025 impartíronse accións formativas non regradas a 787 persoas en especialidades adaptadas ás necesidades actuais da actividade pesqueira.
A esta oferta engádense as axudas destinadas ás confrarías e organizacións profesionais para o desenvolvemento de actividades formativas cofinanciadas polo Fondo Europeo Marítimo, de Pesca e Acuicultura (Fempa). A convocatoria de 2026 contará cun orzamento de 800.000 euros. No exercicio anterior permitiu formar a 1.195 persoas mediante máis de 90 cursos.
Reforzo da remuda xeracional
A incorporación de novos profesionais ao mar continúa a ser unha das prioridades da Consellería do Mar. Neste ámbito, durante 2025 púxose en marcha unha liña de axudas para facilitar os coñecidos como “días de mar”, cun investimento de 350.000 euros que permitiu apoiar a 35 armadores e ofrecer formación práctica a 37 estudantes a bordo de embarcacións pesqueiras.
A Xunta tamén impulsou novas bolsas para titulados en acuicultura e para persoal auxiliar de investigación mariña, cun investimento superior aos 250.000 euros. Paralelamente, traballa nunha nova regulación das titulacións de mariñeiro pescador, patrón local de pesca e patrón costeiro polivalente para simplificar os requisitos de acceso e adaptar a formación ás necesidades actuais do sector.
O Plan de Cultura Marítima supera os 1.500 bens documentados
Durante a súa intervención, Ángeles V. Suárez destacou tamén os avances do Plan de Cultura Marítima de Galicia (Pcuma), desenvolvido en colaboración coa Universidade da Coruña. Desde a súa posta en marcha en 2021, o programa recibiu máis de 507.000 euros de investimento e permitiu documentar arredor de 1.500 bens do patrimonio marítimo inmoble galego.
Segundo explicou, 919 destes elementos eran ata agora inéditos e o traballo abrangueu os 86 concellos costeiros galegos e o Parque Nacional das Illas Atlánticas. A directora xeral defendeu que esta iniciativa constitúe unha ferramenta de investigación, documentación e divulgación do patrimonio marítimo e complementa outras actuacións impulsadas pola Administración autonómica neste ámbito.
Compromiso coa produción de semente mariña
En relación coa situación do criadeiro da Illa de Arousa, Suárez atribuíu a súa problemática á caducidade da concesión estatal de dominio público marítimo-terrestre, vencida en 2014 e non renovada posteriormente. A pesar desta circunstancia, asegurou que a Xunta mantén o seu compromiso coa autosuficiencia na produción de semente mariña a través do Centro de Investigacións Mariñas (CIMA), do Igafa, da rede científica Redemar e do novo criadeiro de O Vicedo, recentemente posto en funcionamento.
