Pontón apela en Ribeira a concentrar o voto galego no BNG o 29N para gañar peso político en Madrid e blindar os servizos públicos

22 Novembro 2026

A portavoz nacional do BNG, Ana Pontón, fixo un chamamento en Ribeira a concentrar na formación nacionalista todo o voto galego nas vindeiras eleccións do 29 de novembro co obxectivo de que Galicia gañe peso político en Madrid e poida defender o dereito a unha vida digna. Pontón interveu nun acto de campaña acompañada polo cabeza de lista ao Congreso pola Coruña, Néstor Rego; a candidata pola comarca, Rosana Pérez; e o portavoz municipal e candidato á Alcaldía, Luís Pérez.

Segundo sinalou a líder do Bloque, o voto á súa formación traduce o peso político en máis investimentos, mellores infraestruturas, reforzo dos servizos públicos e recursos para a vivenda, fronte a un bipartidismo que, ao seu xuízo, “só busca votos en campaña e logo goberna catro anos sen atender as necesidades do País”. Durante o seu discurso, Pontón criticou a xestión de Alberto Núñez Feijóo na Xunta —acusándoo de recortar en sanidade, educación, dependencia e vivenda, ademais de triplicar a débeda pública— e a política de Alfonso Rueda coas baixas laborais, ao tempo que afeou a Pedro Sánchez que presuma dos descontos na AP-9 sen poñer fin á que denominou “estafa” das peaxes.

A portavoz nacionalista advertiu tamén contra o retroceso nos dereitos das mulleres e o modelo centralista do Estado, avogando por reducir o gasto militar —que cifrou en 35.000 millóns en 2025— para destinalo a gasto social, pensións, sanidade e educación.

Pola súa banda, Néstor Rego definiu o BNG como “a única alternativa na Galiza” e un “muro de contención contra o bloque reaccionario”, reivindicando o traballo realizado na lexislatura en materia ferroviaria, dependencia, suba das pensións mínimas e xulgados de violencia machista. Na súa intervención en Ribeira, o candidato puxo especial énfase na defensa do sector pesqueiro e marisqueiro, lembrando a exixencia de anular as 87 vedas da Unión Europea, acadar un novo acordo pesqueiro con Mauritania, aumentar as cotas da sardiña e impulsar a rexeneración das rías mediante un estudo acordado co Goberno para avaliar a perda de produtividade derivada do cambio climático.

Outros artigos

Publicidade

Revista en papel

Opinión

“22 de noviembre de 1963” – Manuel Domínguez

“22 de noviembre de 1963” – Manuel Domínguez

22 de noviembre 1963. Esa tarde estaba escuchando la radio, de joven muy aficionado a ello. Sobre las 09,30 de la tarde la radio da la noticia, el presidente Kennedy ha muerto. Para un jovencito de corta edad ¿Qué importancia pudiera tener esta noticia? El NO-DO, que...

“Retirada de Medallas ao Mérito no Traballo” – Antón Luaces

“Retirada de Medallas ao Mérito no Traballo” – Antón Luaces

Os galegos Pedro Barrié de la Maza, José Fariña Ferreño e José María González-Llanos figuran entre as sete persoas e unha entidade ás que o Ministerio de Traballo retirará as  Medallas ao Mérito no Traballo polos seus vínculos  ao golpe de estado fascista e...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.