Este venres 12 de xuño a CRMH do Barbanza en colaboración co Concello de Ribeira presentará en Ribeira, no Centro Cultural Lustres Rivas, o libro Enrique e Manuel Fernández Sendón. Memoria, palabra e represión. Unha obra na que se desentraña a vida persoal, política e intelectual de dous irmáns ribeirenses que sufriron a represión franquista.
Ademais, este mércores 10 de xuño celebrarase no Ateneo Valle-Inclán de Ribeira (Bar Plaza), ás 11.30 horas, unha rolda cos medios de comunicación para informar da presentación e doutras cuestións.
O dito volume, elaborado por Xosé Luis Axeitos, Uxío Bobillo e Carlos Cimadevila, afonda na traxectoria vital de Enrique e Manuel Fernández Sendón, abordando o seu legado desde a perspectiva da memoria democrática e a represión sufrida durante un dos períodos máis convulsos da historia contemporánea.
O acto do venres contará coa participación de Xosé Luis Axeitos, autor da publicación; Fidel Vidal, psiquiatra xubilado; Carlos Cimadevila, representante da Comisión pola Recuperación da Memoria Histórica da Barbanza (CRMHB); e Ana Barreiro Rego, concelleira de Cultura do Concello de Ribeira.
A iniciativa está organizada pola Comisión pola Recuperación da Memoria Histórica da Barbanza, coa colaboración do Concello de Ribeira, e enmárcase nas actividades destinadas a promover o coñecemento e a reflexión sobre a memoria histórica na comarca.
A presentación está aberta ao público e suporá unha oportunidade para coñecer de primeira man o contido dunha obra que reivindica a importancia de preservar as historias persoais e colectivas vinculadas á represión e á defensa da memoria democrática.
