20190722 A Aula Activa do Mar de Rianxo segue a poñer o punto de mira nos diferentes (e complementarios) oficios relacionados coa pesca, algúns dos cales desenvólvense máis en terra ca no mar e que, polas razóns que sexa, nunca tiveron o recoñecemento que merecían, malia a súa importancia para garantir a boa economía de múltiples familias e empresas. Desta volta, a homenaxe céntrase no oficio de arranxar e manter as artes de pesca, da que xorde a mostra Mulleres Redeiras, enmarcada na Festa Gastronómica dos Produtos do Mar de Rianxo, festividade da que falamos hoxe en O Barbanza.
Coa exposición preténdese difundir e poñer en valor un oficio tradicional desempeñado maioritariamente por mulleres, que, dende tempos inmemoriais, realizan un labor manual de reparación e confección de redes, “diferentes en función do tipo de arte de pesca, da técnica de confección da rede, etc.”
Segundo lembra a organización da mostra sobre a importancia desta oficio, “a arte de reparación e fabricación de redes é un dos máis antigos oficios mariñeiros, e, sen ela, os labores de pesca non se poderían levar a cabo”. Ademais, engade a Aula Activa, “representa un dos sinais culturais de Galiza, como é a actividade relacionada co mar”.
Esta mostra celebrarase o sábado 27 de xullo a partir das 18:00h ao lado da carpa Rianxo cociña o mar.
