Sacauntos Sociedade Cooperativa Galega, con sede en Santiago, deu un paso definitivo na súa estratexia de sustentabilidade industrial. A Oficina Española de Cambio Climático (OECC), dependente do Ministerio para la Transición Ecológica y el Reto Demográfico (MITECO), vén de emitir a resolución oficial pola que se inscribe a compensación da pegada de carbono da organización correspondente ao ano 2023.
Cun sector industrial e gráfico historicamente ligado a un forte impacto ambiental, Sacauntos quixo demostrar que a “economía social e circular non só é viábel, senón plenamente competitiva”. Esta certificación oficial ratifica o éxito do Proxecto Leiro, unha iniciativa de rexeneración patrimonial e ecolóxica deseñada especificamente para absorber e compensar de xeito directo e sobre o terreo as emisións derivadas da actividade da cooperativa.
Mans na terra: carballos para protexer un petróglifo
A diferenza doutros modelos de compensación baseados na compra de créditos abstractos, o Proxecto Leiro destaca, en palabras de Sacauntos, “polo seu impacto local e comunitario”. En colaboración directa coa Comunidade de Montes de Leiro de Rianxo (que traballan co Laboratorio Ecosocial do Barbanza e a Plataforma pola Defensa do Monte), o proxecto céntrase na recuperación ambiental na contorna do Petróglifo do Foxo Vello. Este xacemento, un dos tesouros de arte rupestre máis senlleiros da parroquia de Leiro que conta con gravados inscritos de círculos concéntricos e cazoletas datados na Idade do Bronce, atopábase en serio perigo de deterioración.
Tras un intenso ano de traballo no que se retiraron os eucaliptos e un importante volume de especies invasoras, Sacauntos promoveu unha xornada de voluntariado ambiental para controlar a aparición de gromos de invasoras e plantar carballos, transformando un espazo degradado nun bosque autóctono que protexe o patrimonio arqueolóxico galego.
Esta acción non a fixeron sós. Sacauntos logrou artellar unha alianza sen precedentes que uniu a boa parte do tecido cultural e editorial do país. A xornada contou co apoio e a participación activa de entidades como a Fundación Montescola, Edicións Positivas, Chan da Pólvora, Rodolfo e Priscila, a Librería Aira das Letras, Boadicea editora, Rinoceronte editora, a Fundación Rosalía de Castro (Casa Rosalía) e a Fundación Vicente Risco.
“Para nós, a sustentabilidade non é unha declaración de intencións; está no noso ADN cooperativo”, afirman desde o equipo de Sacauntos. “Esta resolución do Ministerio demostra que unha cooperativa gráfica pode estar na vangarda climática asumindo a responsabilidade real do seu impacto. E facelo, ademais, unindo ás editoras, librarías e fundacións do país para plantar carballos sobre un petróglifo, demostra o poder transformador da cultura e a economía social”.
Sobre Sacauntos S. Coop. Galega: Sacauntos é unha cooperativa gráfica e editorial galega que naceu co obxectivo de transformar o sector cultural e industrial desde os principios da xestión democrática e o coidado ambiental. Como mecenas de institucións clave como a Fundación Rosalía de Castro e a Fundación Vicente Risco, Sacauntos estende o seu compromiso verde cara ao coidado e custodia do patrimonio cultural de Galicia.
