20190717 A Pousada da Galiza Imaxinaria segue adiante este verán co seu importante labor de situar Barbanza e Boiro no cumio da lista estatal de salas de concertos (ese feixe de salas, non moi abondosas pero selectas, que resultan ser case tan importantes coma as bandas e os solistas no que se refire á capacidade para garantir unha boa ración de música). Ao fío disto, o local de Suso Santamaría recibirá en agosto a visita de Juan Perro, lenda viva da música española e do mundo (foi un dos creadores de Radio Futura e, indirectamente, de boa parte do rock independente que veu despois). Será o sábado 3 de agosto, a partir das 22.00 horas. As entradas (23 euros) xa están á venda na Baldani Concept Store e na propia Pousada.
Juan Perro, para que non o saiba, é o sobrenome de Santiago Auserón, nado en Zaragoza o 25 de xullo de 1954. Auserón, que estivo á fronte de Radio Futura dende 1980 a 1992 (dende onde publicou obras magnas como La Canción de Juan Perro ou La ley del desierto, la ley del mar), vén de publicar un novo traballo discográfico, chamado Vagamundo, onde fai unha homenaxe á canción popular española a través dunha revisitación musical e diversa do seu propio repertorio.
