O Boletín Oficial da Provincia publica este luns 30 de outubro as bases e a convocatoria dos procesos selectivos que o Concello de Boiro leva a cabo para cubrir os postos de persoal docente e directivo do Obradoiro de Emprego Medioambiental Torre Goiáns III que se vai desenvolver entre o curso 2023-2024.
En total vanse contratar a cinco persoas que formarán o equipo docente e directivo do Obradoiro de Emprego: un/ha director/a, un/ha mestre/a para a especialidade de xardinería, un/ha mestre/a para a especialidade de repoboamentos forestais, un/ha titor/a docente e un/ha técnico forestal.
Nas bases faise saber que as persoas aspirantes deberán cumprir unha serie de requisitos xerais de acceso ao emprego público como ter a nacionalidade española, non padecer enfermidade ou defecto físico ou psíquico que impida o desempeño das funcións do posto de traballo, non ter sido despedido mediante expediente disciplinario de ningunha administración pública e non incorrer en causas de incompatibilidade ou incapacidade.
Ademais, nas bases especifícase que as persoas aspirantes deberán cumprir unha serie de requisitos en función do posto de traballo como son a titulación acorde coas tarefas a desenvolver, esta en posesión da titulación de galego, contar cunha experiencia mínima no posto de traballo e dispor de permiso de conducir.
O prazo de presentación de solicitudes abre este martes e será de cinco días naturais. As persoas interesadas en formar parte do proceso deberán presentar as instancias e a documentación acreditativa de cumprir cos requisitos de cada posto no Rexistro Xeral ou sede electrónica do Concello de Boiro.
