Un grupo formado por 10 persoas do Centro de Día de Maiores de Porto do Son, entre persoal e usuarias, visitaron este martes 10 de outubro a Catedral de Santiago para quedar máis tarde a compartir un xantar na cidade.
“Con moita ilusión”, así é como describiron a excursión a Santiago de Compostela organizada polo Centro de Día que xestiona COGAMI dende xaneiro do ano 2014.
Para algunhas delas, como afirmaba Eugenio Botana, “é a primeira vez que saio dende que foi a pandemia, co que estou moi ilusionado”.
COGAMI lembra que o Centro de Día de Maiores de Porto do Son, ademais de ser “un recurso social e de apoio ás familias”, tamén “supón un punto de encontro onde teñen cabida actuacións socioculturais con carácter socioterapéutico e, ao mesmo tempo, lúdico e de animación”.
Dentro das actividades de lecer están as saídas como esta que, segundo explica a directora do centro, Cristina Delgado “intentamos motivar a todas as persoas que acoden ao centro con actividades grupais como esta”.
A este centro acoden a diario de luns a venres un total de 40 persoas, cunha idade media que comprende os oitenta anos, e que son atendidas por un cadro de persoas que engloba as 15 persoas contratadas.
