A última fin de semana en Portosín virá completiña de actividades gastronómicas e empresariais. A vila mariñeira vai despedir a tempada alta do verán con dúas interesantes propostas: por unha banda a sétima edición da Feira Outlet de Portosín, organizada pola AEP (Asociación de Empresarios de Portosín) e, pola outra, unha nova convocatoria da Exaltación da Navalla da Ría e do Porco ao Espeto, impulsada dende a Confraría de Pescadores San Andrés de Portosín. Nas súas actividades colabora o Concello de Porto do Son.
Na sétima Feira Outlet de Portosín participarán os establecementos locais adheridos á AEP e virá con descontos de até o 70% nos seus produtos e servizos. Celebrarase na praza do Curro, baixo carpa. Celebrarase o sábado 26 e o domingo 27 de agosto e o horario será de 11.00 a 22.30 horas. Haberá actividades para todos públicos, tamén, por suposto, para a rapazada (con inchábeis e xogos).
Polo que se refire á Exaltación da Navalla da Ría e do Porco ao Espeto, desenvolverase este sábado 26 de agosto a partir das 13.30 horas (Exaltación da Navalla) e o domingo á mesma hora (Exaltación do Porco ao Espeto).
