De brillante pódese cualificar a fin de semana na Ría de Pontevedra, cunhas condicións de mar e vento
envexables para a navegación.
A segunda xornada do XXIV Trofeo Hotel Carlos I Silgar – 36ª Regata Roteiro das Illas disputouse cunha compoñente do 285, é dicir, noroeste, e 10-12 nós de intensidade, ideais para os Cruceiros e con pouca
onda para os 6 Metros, que puideron completar outras dúas mangas os Clásicos e unha costeira os ORC e Open.
Triunfo indiscutible do Bribón, de José Cusí, que se fixo con dous primeiros postos parciais nas dúas mangas de hoxe, saldando a xeral con 7 puntos, tres menos que o ata este domingo líder da proba, o
Alibabá, de Miguel Lago, que finalizaba con 10, despois dun terceiro e un cuarto nesta segunda xornada. A terceira praza era para o Aida, de Javier da Gándara, con 12 puntos.
Bribón navega polo Real Club Náutico de Sanxenxo e Alibabá polo Monte Real Club de Iates de Bayona, mentres que o Aida faio polo Real Club Náutico da Coruña.
Nos Open dos Cruceiros, era o Samoa, de Simón Pedro Bernárdez, do Real Club de Mar de Aguete o que recollía o primeiro premio, seguido de Cassandra, de Javier Pazó, do Club Náutico Portonovo e Adaxe Catro no bronce, de Alejandro Diéguez, do Real Club de Regatas de Galicia.
Nos ORC gran vitoria do Ronáutica Mariñas, de Jorge Carneiro, do Club Náutico San Telmo, que ratificaba a súa tarxeta de líder, cun Youkounkoun, que era segundo, de Adolfo Castro, do Club Náutico Portonovo, sendo terceiro o Piko Norte, de José Manuel Castro, do Club Náutico Boiro.
A entrega de premios estivo presidida por Telmo Martín, alcalde de Sanxenxo, acompañado de Leonardo López, director do Hotel Carlos I Silgar; Marcos Guisasola, concelleiro de deportes e deputado provincial, así como os directivos do club anfitrión, Fernando Casas e Modesto Prieto.
Recolleron premios S.M. O Rei Emérito Don Juan Carlos I, patrón do Bribón, e a súa Alteza Real, a Infanta Dona Elena, tripulante a bordo do Alibabá, de Miguel Lago.
