O Concello de Ribeira aprobou en pleno extraordinario o Plan de Acción da Axenda Urbana por unanimidade. Este Plan de Acción é o produto dun proxecto levado a cabo durante o último ano, no que participou tanto o Concello como a cidadanía local para construír unha Ribeira máis eficiente, sostible e humana.
Un proxecto para mellorar o futuro de Ribeira
As actuacións prioritarias identificadas durante o proceso enmárcanse en catro eixos estratéxicos, que coinciden coa visión local do futuro do municipio: Ribeira intelixente, Ribeira eficiente, Ribeira turística e Ribeira humana.
A Ribeira intelixente busca mellorar a administración electrónica e facilitar así os trámites en liña, ademais da creación dun laboratorio cidadán de ideas para impulsar a participación continua da poboación ribeirense nos avances do municipio. Pola súa banda, a Ribeira eficiente inclúe proxectos como a mellora da mobilidade en bicicleta ou os plans de transición enerxética.
A Ribeira turística céntrase na posta en valor do patrimonio cultural e a creación de novas áreas verdes, ademais do desenvolvemento dun plan de sustentabilidade turística. Por último, a Ribeira humana expón un programa de integración social para colectivos vulnerables e accións para mellorar a planificación urbanística local.
Identifícase ademais a necesidade de crear un Plan de Adolescencia e Mocidade para a cidadanía máis nova de Ribeira.
A totalidade do proxecto de Axenda Urbana, incluíndo as fases realizadas e os resultados obtidos, pode consultarse na web agendaurbana.ribeira.gal.
Un Plan de Acción cocreado por Ribeira
Esta participación da cidadanía é un dos eixos principais do proxecto de Axenda Urbana, e concretouse mediante varias ferramentas para canalizar esta retroalimentación constante co Concello.
Un primeiro paso nesta dirección foi a consulta cidadá realizada en maio de 2022 para identificar os retos e contrastalos cos que propoñía o Concello.Ademais, realizouse a presentación dun primeiro borrador deste Plan de Acción o pasado 30 de novembro mediante varias sesións organizadas no Concello e en varios colexios do municipio. Estas sesións serviron ademais para facilitar que as persoas asistentes puidesen seguir achegando as súas opinións para construír a Ribeira que visualizan para os próximos anos. Finalmente, o Concello puxo ao dispor da cidadanía un formulario en liña para que poder realizar achegas adicionais, que estivo activo ata o 13 de decembro.
Este borrador contiña un total de 60 proxectos, 10 dos cales foran identificados como estratéxicos.
Durante esta fase de participación recibíronse un total de 436 respostas e 188 propostas de actuación. A partir da análise destas propostas, incorporáronse algunhas modificacións ao Plan de Acción provisional, a maioría delas matizando ou ampliando o sentido dalgunhas accións xa recollidas. Cabe destacar a consideración de Proxecto Estratéxico da creación dun Plan de Adolescencia e Mocidade, elevado a estratéxico tras as solicitudes cidadás.
Ribeira continua así apostando por deseñar o seu futuro baseado na construción dun municipio máis humano, sostible e intelixente; en liña cos principios propostos pola Axenda Urbana Española.
