A Deputación da Coruña organizou este martes 13 de decembro un foro sobre como combater os incendios forestais e que medidas tomar para previr esta lacra e recuperar os montes. No transcurso deste encontro, o presidente Valentín González Formoso, afirmou que “o despoboamento no rural e o cambio climático” son os dous grandes retos a enfrontar para acabar cos incendios forestais. O foro, no que tamén colaboraron Next Educación e a European Climate Fundation, celebrouse no auditorio do Edificio de Servizos Múltiples do Concello de Culleredo. Foi inaugurado polo alcalde e deputado de Transición Ecolóxica José Ramón Rioboo, o xornalista Manuel Campo Vidal e o propio Formoso. Nunha das mesas redondas, A voz dos territorios afectados, participou José Ramón Romero, alcalde de Boiro, un dos concellos da nosa terra onde o lume deixou máis pegada este pasado verán.
O presidente da Deputación cualificou a cifra de incendios do pasado verán, con máis de 46.000 hectáreas queimadas en Galicia, de “dramática”, e engadiu que “non pode ser que en Galicia haxa unha superficie abandonada tan grande nun país tan produtivo e onde hai tanto talento, tanta xuventude que emigra de Galicia, podería non facelo se este país fose máis produtivo”, afirmou, convidando á todas as institucións responsábeis a “adoptar medidas valentes”.
O presidente rematou a súa intervención concluíndo que “os incendios resolveranse cando volvamos producir no rural, cando a xente volva a vivir no rural, se somos capaces de garantirlle servizos como ter un centro de saúde preto, un colexio ao que levar aos seus fillos e fillas, ou un autobús que o transporte cara os centros públicos onde haxa outro tipo de prestacións máis completas”.
O foro incluíu durante toda a xornada diferentes relatorios.
O primeiro foi sobre a importancia da transición ecolóxica para loitar contra os incendios e correu a cargo do enxeñeiro de Montes, Juan Picos. Tamén se deu voz aos territorios afectados por vagas de lumes deste verán, como Boiro e o Barco de Valdeorras, coas intervencións dos seus alcaldes, José Ramón Romero e Alfredo García, acompañados dun representante da ASC Bombeiros de Galicia e dunha asociación veciñal.
Falouse das posíbeis solucións e da importancia da prevención e da loita contra o despoboamento fronte ao lume, cun coloquio no que participaron representantes dos principais medios de comunicación galegos: Alfonso A. Riveiro, director de El Progreso, María López Cedrón, responsable de Somos Agro en La Voz de Galicia, Ramón Valles, director de RTVE Galicia; Mario Moreno, director rexional de SER Galicia; Alejandro López, subdirector de informativos de TVG e Ana Martínez, delegada de Axencia EFE en Galicia.
A xornada pechouse analizando o papel das institucións, que defenderon representantes das catro deputacións galegas.
