Os Concellos de Ribeira e Porto do Son inauguraron este 22 de outubro a sétima convocatoria do Obradoiro de Emprego Tahume, iniciativa conxunta dos dous Gobernos municipais para achegar formación laboral práctica á mocidade local para incrementar as súas posibilidades de atopar un posto de traballo. Segundo fixeron saber, un total de vinte veciños de Ribeira e Porto do Son (dez homes e dez mulleres) principiaron a súa andaina no obradoiro, centrándose, desta volta, nas especialidades de pintura industrial en construción e actividades auxiliares en conservación e mellora de montes, con dez alumnos en cada unha delas.
O alcalde de Porto do Son, Luis Oujo, e o segundo tenente de alcalde de Ribeira, Emilio Pérez, presentaron na Casa de Cultura de Xuño os detalles desta iniciativa que está co-financiada pola Xunta de Galicia e que ten un carácter dual, configurándose como un programa mixto de formación e emprego cunha duración de nove meses.
Ademais, engadiron, “os labores desenvolvidos por estes vinte alumnos-traballadores repercutirán positivamente nos dous concellos”. Así, no que se refire a Ribeira está previsto desenvolver traballos que redunden na conservación e mellora do monte de San Alberte e, por outra parte, o alumnado de pintura industrial efectuará entre outras accións o pintado da fachada do colexio de Artes, e o pintado do aparcamento do complexo da Fieiteira, amais da impemeabilización e pintado dunha praza na avenida da Coruña.
No que respecta ao municipio sonense, entre outras accións prevese o pintado das fachadas do Edificio de Usos Múltiples, o Viveiro de Empresas, o Cemiterio Municipal de Porto do Son ou o Centro de Saúde de Portosín, así como a mellora de masa arbórea en Miñortos, Goiáns, Baroña, Castro, Madalena e o lugar de Ponte Medieval. Tamén se contratou para o obradoiro un equipo docente formado por unha directora, dous mestres, unha titora e unha auxiliar administrativo.
