Centos de persoas participaron este domingo nas mobilizacións convocadas pola Confederación Intersindical Galega (CIG) en 24 concellos galegos, entre eles Ribeira, contra “a estafa da luz” e para “reclamar” a recuperación das centrais hidroeléctricas, a posta en marcha dunha tarifa eléctrica galega e que “se recoñeza a enerxía como un dereito universal”.
Nas protestas realizouse unha queima simbólica de facturas “como acto de desagravio”, pero tamén como de “reivindicación contra unhas eléctricas que, mentres acumulan beneficios multimillonarios, abocan á clase traballadora á pobreza enerxética”.
O secretario xeral da CIG, Paulo Carri explicou na concentración de A Coruña que con esta xornada se pretende esixir aos gobernos políticas que freen a escalada imparable da factura eléctrica.
