O Concello de Boiro informou do remate do curso de Inglés Nivel Medio do Programa Integrado de Emprego (PIE) municipal destinado á poboación feminina local: unha actividade de 45 horas de duración cuxo obxectivo foi que as participantes puidesen adquirir coñecementos para entender e formar expresións complexas e comunicarse en lingua inglesa con maior confianza.
Esta formación forma parte do módulo no sector hostalería, ao abeiro do cal realizáronse actividades formativas nos seguintes ámbitos temáticos: Recepción de Aloxamentos e Limpeza de Establecementos Turísticos. A estas actividades súmanse as formacións de Técnicas de Venda e Atención ao Cliente e Follas de Cálculo e Bases de Datos.
O Programa Integrado de Emprego do Concello de Boiro está dirixido exclusivamente a mulleres e combina a formación online e presencial, fomentando a conciliación familiar e laboral das participantes. O Programa Integrado de Emprego está subvencionado pola Consellería de Emprego e Igualdade da Xunta de Galicia e o Servizo Público de Emprego Estatal.
