20190913. Ribeira dará cabida este sábado 14 á nova proposta Mai Mai, da man de Baobab Teatro baixo xestión de Culturactiva. Esta cita enmárcase na campaña ‘Nós contra a violencia’ posta en marcha este verán pola Xunta de Galicia, a través das secretarías xerais de Política Lingüística e da Igualdade, no marco do Pacto de Estado contra a Violencia de Xénero, cos obxectivos de dinamizar a lingua galega e sensibilizar contra este tipo de violencia.
Ao acto de presentación desta cita asistiron o secretario xeral de Política Lingüística, Valentín García; o alcalde de Ribeira, Manuel Ruiz; a concelleira de Servizos Sociais, Ana Ruiz; e a actriz Andrea Bayer, quen é tamén responsable de Baobab Teatro e protagonista do espectáculo.
O representante da Consellería de Cultura e Turismo destacou “que Mai Mai integra a perspectiva de xénero e que introduce elementos para a reflexión e para o traballo en prevención da violencia, para alén de ofrecer unha alta calidade escénica e de traballo actoral”, convidando “tanto ás familias de Ribeira e do Barbanza coma ás do resto de Galicia a participaren nas funcións da xira que está a desenvolver Baobab Teatro polas catro provincias, da man do programa ‘Nós contra a violencia’.”
Mai Mai é un espectáculo de Baobab Teatro dirixido a nenos de máis de 5 anos e ás súas familias. Nel trátanse temas como a igualdade, o apoderamento da muller e a prevención da violencia de xénero, alén doutros como a concienciación ecolóxica.
No marco da campaña ‘Nós contra a violencia’, Mai Mai chegará este outono aos concellos de Cedeira, Lalín, Ribeira, A Rúa, Ponteareas, Arteixo, Ribadavia e Muros, todos eles incluídos na Rede de Dinamización Lingüística (RDL).
A función do sábado en Ribeira está prevista para as 19.30 horas no Auditorio municipal, sendo a entrada libre e de balde ata completar a capacidade da sala.
Ademais da citada actividade, o programa ‘Nós contra a violencia’ ofrece numerosas propostas escénicas e materiais para traballar en dinamización lingüística e sensibilizar conta a violencia de xénero. Entre elas, inclúese tamén o espectáculo O rueiro das liortas, da compañía do Elefante Elegante, unha proposta que afonda no papel das mulleres nas relacións de parella e que botará a andar en concellos da RDL no mes de novembro.
Dentro das propostas musicais, a campaña ofrece o espectáculo A Roda da igualdade: ela e eles, así como obradoiros para pais e nais no marco do proxecto ‘Igual-Son’, con música, danza e contacontos, guías educativas sobre prevención da violencia de xénero na mocidade e outros materiais educativos centrados nos riscos e potencialidades das redes sociais e un manual práctico de ferramentas educativas para prever a violencia contra as mulleres, entre outras iniciativas que se irán dando a coñecer nas vindeiras semanas.
