Este venres 13 celebrase no Museo do Gravado de Artes (Ribeira) a inauguración da exposición Un humanismo moderno. Colmeiro – Seoane – Picasso – Vertès. Será ás 20.30 horas na sala 1 do museo. Contarase coa presenza do presidente da Fundación Museo de Artes do Gravado e alcalde de Ribeira, Manuel Ruiz.
A mostra, que ficará aberta até o 13 de outubro, é un achegamento a dúas figuras cimeiras da arte galega, Manuel Colmeiro e Luís Seoane, que “no exilio arxentino e durante os anos corenta desenvolven unha estética con resonancias clasicistas”. En diálogo con estes autores, o Museo do Gravado expón a famosa Suite Vollard de Pablo Picasso, cen gravados feitos en diversas técnicas (buril, punta seca, augatinta ao azucre e augaforte), elaborados entre setembro de 1930 e xuño de 1936 e as ilustracións de Dafnis e Chloé (1954) realizadas polo artista de orixe húngara Vertès, un gravador afincado en Francia que desenvolve unha obra con referencias picassianas nos mesmos anos que os traballos dos devanditos artistas galegos exiliados.
