O Concello de Porto do Son quere seguir reivindicando o seu rico patrimonio e poñelo en valor de cara ao desenvolvemento cultural, económico e turístico do termo municipal.
Nesta tempada, entre outros tesouros locais, o Goberno sonense está a poñer o foco nas fontes, das que Porto do Son posúe unha manchea de exemplos destacados, non só pola calidade das augas senón pola importancia histórica e artística das construcións que as acompañan.
Estes días o Concello compartiu os traballos de acondicionamento, restauración e limpeza levados a cabo na Fonte do Castrallón e tamén na Fonte de Resúa.
A estes traballos cómpre engadir os desenvolvidos na contorna da Fonte de Calo e máis na da Fonte de Jansín.
O Concello tamén compartiu imaxes e datos do remate das obras realizadas na rúa da Fonte de Portosín, no que foron investidos 100.000 euros para “mellorar o aspecto xeral da vía, redefinir o ámbito dando prioridade ao peón, renovar o pavimento, eliminar as barreiras arquitectónicas, así como limpar e encintar a fonte do lugar, que xa loce impoluta”.
