A Deputación da Coruña subvencionará con 250.000 euros a adquisición de vehículos para os clubs de remo e piragüismo da provincia da Coruña. A deputada de Deportes, Cristina Capelán, sinalou que “isto se publicará no Boletín Oficial da Provincia a vindeira semana e que permitirá a dez entidades destas disciplinas deportivas renovar os seus vehículos”.
A convocatoria atende a unha demanda de 40 clubs de remo e piragüismo da provincia da Coruña, xa que lles resulta imprescindíbel contar cun vehículo axeitado para transportar as súas embarcacións e poder adestrar e participar en competicións deportivas. Ademais, dito chamamento contará cun orzamento de 125.000 euros para cada modalidade. Os vehículos adquiridos polas entidades deberán ser novos e cun custe mínimo de 31.250 euros e un máximo de 50.000. A Deputación subvencionará ata o 80% do custe total de adquisición das furgonetas, é dicir, 25.000 euros como moito por vehículo.
A Deputación terá en conta criterios coma o número de deportistas federados ou a cantidade de menores de 18 anos que practican o deporte. Tamén as actividades que se realizan e a antigüidade do vehículo do que xa dispoñen, así como o uso deste vehículo.
