O domingo 20 de decembro vaise celebra en Ribeira unha importante actividade cultural e solidaria coa que mobilizar recursos e saír ao paso da grave crise sanitaria, social e económica na que están mergulladas moitas familias, agravada pola persistencia da pandemia e posta de manifesto, especialmente, nestas datas próximas ao Nadal.
Trátase dun espectáculo a favor de Cáritas Parroquial de Ribeira que está programado para o Auditorio de Ribeira, ás 19.00 horas e que incluirá o recital A emigración galega, Cancións de ida e volta, a cargo de Borja Quiza (barítono) e Fernando Briones (piano).
Ao rematar o concerto (unha escolma de cancións de compositores da nosa terra para voz e piano intercaladas con explicacións dos temas musicais en cadanseus contextos históricos e socioculturais, falando do significado das letras e dos autores), a comunidade de Cáritas realizará un sorteo de agasallos. A entrada será de balde previa recollida de convite na Parroquia de Santa Uxía, até encher o aforamento que será limitado por mor dos protocolos anti-COVID.
