O Concello de Boiro está a traballar no acondicionamento do aparcadoiro de A Boqueira de A Negral para que poida abrir para os usuarios neste verán. Un dos obxectivos da administración local é aumentar o espazo de aparcamento no centro urbano e, con esta actuación, habilitaranse 60 novas prazas gratuítas.
A administración local quere mellorar a mobilidade no municipio e aumentar os espazos de aparcamento en todo o termo municipal e,
especialmente, nas zonas comerciais. A habilitación do espazo que antes
estaba reservado para camións na Avenida da Constitución para o
estacionamento de vehículos supuxo máis de 80 prazas de estacionamento en Boiro.
Co acondicionamento do aparcamento de A Boqueira vanse gañar outras 60 prazas no casco urbano. Os operarios municipais levan meses traballando para que o aparcadoiro poida abrir, xa que ata o de agora estaba ocupado polo material de obra. Este material, o que podía estar ao aire libre, levouse para as naves situadas no polígono e o demais seguirá na Boqueira, nun espazo acondicionado para o mesmo, separado do espazo de aparcamento cunha valla metálica.
Os operarios municipais están rematando as tarefas de acondicionamento interior e exterior para que o aparcadoiro poida abrir no mes de xullo. Estará aberto durante todo o día e de xeito gratuíto.
