No marco das Festas da Guadalupe haberá novamente unha marxe ampla para homenaxear aos maiores do concello de Rianxo. E, tamén, para adicarlles unha xornada enteira dos festexos, que coincide co 16 de setembro: o Día dos Nosos Maiores.
O programa deste día inclúe varias actividades encadradas neste ámbito, como o Xantar de Confraternidade que se celebra en Casa Pachín e que xa ten aberto o prazo de inscrición a través da Concellería de Servizos Sociais de Rianxo (o período remata o 11 de setembro). A festa terá un custe de 25 de euros.
A vertente musical do xantar (vermú e música e baile posterior) virá da man de José Manuel Domínguez. O Concello habilitará autobuses dende Rianxo e outras parroquias para facer máis doados e seguros os desprazamentos ata a Casa Pachín, en Taragoña. O xantar comezará ás 15.00 horas e previamente haberá unha sesión vermú.
As persoas que queiran participar do Xantar de Confraternidade poderán inscribirse no Cuartel Vello, onda o reparto dos libros da Guadalupe, ata o día 11 de setembro.
