Continúa a formación tecnolóxica na nosa comarca, unha liña de actividade moi indicada para combater, con capacitación dixital e competitividade, as adversas consecuencias da pandemia de COVID-19. A aula CeMIT do Concello de Boiro vén de informar de que ten abertas as inscricións dos cursos de formación por videoconferencia do mes de xuño. A aula lembra que aínda hai prazas dispoñíbeis para o curso de GIMP, que se vai impartir entre os días 15 e 18 de xuño, en horario de 11.00 a 12.00 horas.
A aula recorda que GIMP é un programa libre de edición de imaxes dixitais en forma de mapa de bits, que ofrece múltiples posibilidades a nivel de usuario e a nivel profesional. Neste curso as persoas participantes van iniciarse na utilización deste programa e aprender sobre o uso de capas, ferramentas de selección, montaxes simples e conceptos básicos de imaxes dixitais para a elaboración de carteis.
As inscricións ao curso poden facerse mediante correo electrónico axentetic@boiro.org ou no teléfono 981 84 26 35. Máis información a través da web de ComparTIC.
