20190716. O Diario Oficial de Galicia publicou onte a aprobación no cambio de titularidade a favor da Consellería de Infraestruturas e Mobilidade de treitos da estrada provincial DP-7310, no Concello de Ribeira, coma accesos á autovía do Barbanza (AG-11).
O departamento de Infraestruturas da Xunta de Galicia foi quen solicitou que lle fosen transferidos estes tramos provinciais, conformando cos construídos con novo trazado unha única vía de titularidade autonómica, unha vez materializada a súa transferencia, co obxectivo de “racionalizar a rede viaria e darlle o mellor servizo posible aos cidadáns.”
Deste xeito, transfírenselle á Xunta tres tramos de lonxitudes de 427 metros, 326 e 298, sumando un total de 1.051 metros. Así, o Goberno autonómico incorporará a lonxitude total deste ramal da AG-11 á súa rede. Ademais, sinalan que os citados tramos “beneficiaranse dos medios da conservación común e tamén serán obxecto de actuacións promovidas pola Administración autonómica.”
