O secretario xeral de Lingua salienta a proxección internacional do idioma a través da rede de lectorados universitarios
O secretario xeral de Lingua, Valentín García, reivindicou a contribución do galego á riqueza e diversidade do patrimonio cultural europeo durante o acto institucional celebrado nos soportais do Museo das Peregrinacións e de Santiago polo Día Europeo das Linguas, unha conmemoración que se adiantou cun recital poético e multilingüe a cargo de estudantes de Secundaria e Bacharelato do IES Xelmírez II aberto á participación do público, xunto cunha mostra de libros da Consellería de Cultura, Lingua e Xuventude que foron entregados como agasallo aos asistentes
Durante a súa intervención, o representante autonómico salientou a importancia de preservar a diversidade lingüística e de fomentar o entendemento intercultural mediante a aprendizaxe de idiomas, enmarcando esta cita no recente acordo para renovar o Plan Xeral de Normalización da Lingua Galega con case 700 medidas de consenso para prestixiar o uso social da lingua
No ámbito da difusión exterior, García subliñou o labor das bolsas da Xunta en lectorados universitarios, destacando que o galego se estuda actualmente nunhas 40 institucións académicas de todo o mundo, entre as que figuran oito universidades españolas con medio milleiro de alumnos, 21 centros europeos con preto de 1000 estudantes en países como Alemaña, Francia, Italia ou o Reino Unido, ademais de oito lectorados en América e as recentes incorporacións na India e en Mozambique.
