A delegada da Xunta, Belén do Campo, xunto coa directora territorial da Consellería do Mar, María José Cancelo, mantiveron este xoves 12 de marzo unha reunión de traballo coa xerente do Grupo de Acción Local do Sector Pesqueiro (GALP) Seo Fisterra-Ría Muros-Noia (Costa Sostible) Manuela Oviedo, na que analizaron a situación actual do grupo e fixeron balance das últimas convocatorias de axudas destinadas ao desenvolvemento local e ao sector pesqueiro.
Como lembraremos, o GALP Seo Fisterra-Ría Muros Noia (Costa Sostible) abrangue 9 concellos das comarcas de Costa da Morte e Barbanza: Carnota, Cee, Corcubión, Dumbría, Fisterra, Muros, Noia, Outes, Porto do Son, e está integrado por un total de 41 entidades socias, das cales o 36,58% representa o sector social; o 26,82%, o sector pesqueiro; o 22,5%, o sector público; e o 14,63%, o sector económico. A entidade conta ademais con 18 entidades vocais, nas que están representados pósitos locais, colectivos de redeiras, empresarios e comerciantes, entidades veciñais, culturais e deportivas, así como concellos.
No encontro realizouse tamén balance da convocatoria de axudas aprobada no ano 2025 para proxectos vinculados ao desenvolvemento local e ao sector pesqueiro, co-financiada pola Consellería do Mar e polo Fondo Europeo Marítimo, de Pesca e de Acuicultura (FEMPA). Concretamente, o ano pasado esta entidade apoio nestes municipios para 14 proxectos cun importe de axudas de máis de 1,3 millóns de euros e mobilizaron un investimento total de máis de 1,6 millóns de euros. A maioría destas iniciativas foron presentadas por confrarías de pescadores como as de Corcubión, Fisterra, Muros, Noia, Porto do Son ou Lira, ademais tamén contan con proxectos aprobados concellos, asociacións e empresas da contorna.
Belén do Campo informou ademais de que a Xunta, a través da Consellería do Mar, xa pechou o prazo para solicitar as axudas deste ano para proxectos ao abeiro das Estratexia de Desenvolvemento Local Participativo (EDLP) dos GALP, dotada cun total de 6,9 millóns de euros. Trátase de apoios de carácter plurianual, co-financiados pola Consellería do Mar e polo FEMPA, dirixidos aos Grupos de Acción Local do Sector Pesqueiro que concorran de maneira individual ou conxunta. A través de este GALP presentáronse 19 propostas para esta nova convocatoria.
Esta orde corresponde coa cuarta edición e son achegas que contribúen a promover unha economía azul sostible nas zonas costeiras, fomentando o desenvolvemento das comunidades pesqueiras e acuícolas, a mellora das condicións laborais, a creación de emprego, o impulso da innovación, así como a valorización do patrimonio cultural e medioambiental.
