O Ministerio Fiscal acusa un matrimonio, un curmán da vítima e un dono dunha inmobiliaria dunha manobra orquestrada.
A sede compostelá da Audiencia Provincial da Coruña acollerá o vindeiro mércores o xuízo contra catro persoas acusadas de estafar un veciño de Ribeira co propósito de facerse cunha finca que este herdara no municipio de Boiro.
Segundo o escrito do Ministerio Fiscal, dous dos acusados —un matrimonio— aproveitáronse dos problemas de alcoholismo da vítima para conseguir que asinase un contrato de compravenda da parcela. Nese primeiro documento estipulábase un prezo de 90.000 euros, facendo constar que o importe fora entregado no mesmo acto, cando en realidade non se lle pagou tal cantidade e o único que recibiu foron oito euros.
A Fiscalía considera que esta actuación formaba parte dunha “manobra fraudulenta” elaborada de común acordo co curmán da vítima e co propietario dunha inmobiliaria. Apenas dezaseis días despois, redactaron un segundo contrato, desta volta por 5.000 euros, obtido tamén “aproveitándose do seu estado de embriaguez”, e novamente sen aboar cantidade algunha. O obxectivo, segundo o Ministerio Fiscal, era crear un título novo para lograr a inmatriculación da finca no Rexistro da Propiedade a nome dunha empresa con sede en Madrid por 6.000 euros.
Por estes feitos, a Fiscalía solicita para cada un dos acusados unha pena de 3 anos e 6 meses de prisión, ademais de inhabilitación, multa e o pago dunha indemnización conxunta de 6.000 euros á vítima.
