O espectáculo As que cortan o bacallau levarase a escena en Ribeira o 20 de decembro, ás 20.00 horas, no novo Auditorio Municipal. Trátase dun evento promovido por Bailadela, As Sete Linguas e a Asociación Francisco Lorenzo Mariño (Aguiño) coa colaboración da Concellería de Cultura e a favor de Cruz Vermella de Ribeira.
No acto de presentación participaron a concelleira de Cultura, Ana Barreiro; Manola Valiño, Alicia González e Esperanza Codesido -directora, vogal e secretaria de Bailadela e As Sete Linguas, respectivamente-; Moncha Sampedro e Teresa Sampedro -tesoureira e vogal de Francisco Lorenzo Mariño-; e Ángeles Cores, Ángeles Mera e María Rey -expresidenta, presidenta e coordinadora de Cruz Vermella Ribeira-.
A edil manifestou que todas as propostas presentadas “demostra que temos un tecido asociativo e cultural moi forte e, ademais, moi implicado e solidario”.
Tamén quixo aproveitar a ocasión para agradecer para felicitar o labor da xa expresidenta de Cruz Vermella, Ángeles Cores, e felicitar á súa sucesora, Ángeles Mera, trasladándolle os seus mellores desexos á fronte desta nova andaina.
Pola súa parte, a directora de Bailadela e As Sete Linguas, Manola Valiño, explicou que tódolos anos levan a escena unha historia acompañada de coplas e instrumentos varios, optando este ano “por unha historia relacionada coa conserveira e as mulleres que nesa época traballaban alí”.
A entrada solidaria pode adquirirse por un importe de 5 euros na propia sede de Cruz Vermella, se ben a rapazada ata 16 anos non terá que pagar. Ademais, habilitarase a fila 0 para quen non poida asistir, pero decida axudar igualmente. O recadado irá destinado á compra de xoguetes para que “ningún neno de Ribeira quede sen xoguete”, segundo indicou a súa expresidenta, Ángeles Cores.
