As Festas do Carme de Porto do Son, unha das citas máis agardadas do calendario local, celebraranse do 7 ao 11 de setembro cunha programación chea de música, tradición e actividades para todos os públicos.
O alcalde, Luis Oujo, acompañado por membros do goberno local e a técnica de Cultura, Lidia Moledo, presentou hoxe o cartel festivo, no que destacou que estas celebracións “son unha das máis importantes do municipio e un punto de encontro para veciñanza e visitantes”. O rexedor agradeceu tamén a todas as persoas e entidades que fan posible a organización desta festa.
Durante cinco días, Porto do Son acollerá pasacalles, procesións, misas solemnes, torneos deportivos, verbenas con grandes orquestras e actividades para a rapazada, ademais dun gran broche final con fogos artificiais e festa da auga.
Programación destacada
- Domingo 7 (Véspera): Pregón a cargo de Juan Fuentes na praza de España e verbena con Los Españoles, Marbella e disco móbil Chocolate.
- Luns 8 (Virxe do Carme): Procesión e misa solemne coa Banda de Música de Caamaño, procesión marítima con ofrenda floral polos mariñeiros falecidos e verbena con América SL e New York.
- Martes 9 (Virxe de Loreto): Misas na capela de Loreto durante todo o día, misa solemne, sardiñada popular amenizada por Paco de Leña e verbena con Kubo e disco móbil.
- Mércores 10 (San Roque): Misa e procesión na Capela de Atalaia e verbena con Los Satélites e Finisterre.
- Xoves 11 (Caridade): Misa solemne, inchables e festa da escuma para os máis pequenos, verbena con París de Noia e Triunfo, e un gran final con fogos de artificio, pasacalles e festa da auga coa Charanga Os Celtas.
Con este amplo programa, o Concello de Porto do Son quere manter viva unha das súas tradicións máis populares, que combinan devoción relixiosa, música, gastronomía e diversión interxeracional, converténdose nun gran atractivo para veciños e visitantes.
