O presidente da mancomunidade Barbanza Arousa e alcalde de Rianxo, Julián Bustelo; o alcalde de Boiro, José Ramón Romero; o alcalde da Pobra do Caramiñal, José Carlos Vidal; o alcalde de Ribeira, Luis Pérez Barral e a xerente da mancomunidade, Fátima Cachafeiro, participaron na tarde deste luns 16 de xuño, en Xixón (Asturias), na sinatura do protocolo de irmandade das localidades nas que recala a iniciativa turística O Camiño de Santiago a Vela, unha travesía marítima comercializada polo operador Northmarinas desde hai dez anos e que conta co apoio de Barbanza Arousa.
En palabras da mancomunidade, esta iniciativa “encádrase dentro da estratexia da Mancomunidade de potenciar o Camiño de Santiago, tanto por mar coma por terra, coma produto desestacionalizador da demanda e de ampliación da pegada económica do turismo”.
Todos os representantes convidados destacaron a pegada que este itinerario deixa nos que se animan a completala e que supón un exemplo para o turismo sustentábel.
O protocolo de colaboración asinado ten como obxectivo fortalecer a cooperación entre a vintena de localidades nas que fai parada esta travesía, promovendo o crecemento do sector náutico a través do desenvolvemento de actividades socioculturais, turísticas e deportivas vencelladas ao mar e aos portos.
A sinatura do protocolo fíxose coincidir cunha das etapas de descanso desta travesía internacional que partiu a comezos deste mes de xuño de La Rochelle, en Francia, navegando por toda a costa norte de España. Terá unha duración de 27 días, entre etapas de navegación e descanso; chegando a Barbanza Arousa o vindeiro 29 de xuño.
Asemade, a Mancomunidade participou tamén no acompañamento aos peregrinos na súa saída dende o porto de Xixón.
