O presidente da Real Academia Galega (RAG) e veciño de Muros, Henrique Monteagudo, estivo este xoves 8 de maio pola tarde na Fábrica de Sel para dar unha charla sobre Falares e Cantares Muradáns, dentro da programación do Mes das Letras no Concello de Muros, centrado na festa do 17 de maio (que este ano celebra e homenaxea a tradición oral e a poesía galega das cantareiras e as pandeireiteiras).
Monteagudo repasou algunhas das expresións e os versos que forman parte desta tradición oral en Muros. Ao remate do seu relatorio, recibiu un agasallo de man da alcaldesa, María Lago, e a concelleira de Cultura, Caridad González.
“Quero agradecer persoalmente a presenza hoxe aquí en Muros de Henrique, veciño noso pero cunha axenda agora mesmo moi apertada polas súas novas responsabilidades”, afirmou Caridad González.
Pola súa banda, María Lago lembrou “a importancia nas nosas vidas e en familias como a miña das cantareiras, que sen dúbida merecen o recoñecemento destas Letras Galegas”.
