O tenente alcalde e concelleiro de cultura, Anxo Núñez Fernández, xunto con Carlos Outeiral Miniño, director do grupo de teatro Terra de Outes, presentou na mañá deste 20 de febreiro o cartel da primeira edición da Mostra de Teatro Amador de Outes “Nicolasa Añón”. Segundo fixeron saber, a axenda inclúe funcións todos os sábados ás 20.00 horas, dende o 8 de marzo ate o 12 de abril, no auditorio da Casa da Cultura. A escolma de pezas a representar foi elaborada pola Asociación Cívico-Cultural Terra de Outes conxuntamente co Concello de Outes. O obxectivo da mostra é dar a coñecer agrupacións de teatro amadoras e achegar o seu traballo á veciñanza e visitantes.
O tenente alcalde afirmou: “Esta mostra nace da colaboración entre a área de Cultura e o grupo de teatro de Terra de Outes e agardamos que sexa a primeira de moitas por vir”.
Pola súa banda, Carlos Outeiral sinalou que “desenvolvemos esta mostra en colaboración con outras cinco asociacións e agrupacións que se achegan a Outes para compartir o seu traballo coa veciñanza”.
As obras serán de acceso libre e gratuíto ate completar aforo polo que non se farán reservas. A programación arrinca o 8 de mazo con Quen o diría, da Asociación Charamela de Melide.
O 5 de abril celebrarase a estrea da obra O doente imaxinario… Daquela maneira do grupo anfitrión.
A axenda ao completo pódese consultar na web municipal, outes.gal.
