O Concello de Boiro celebrou este xoves día 19 o pleno ordinario da Corporación local correspondente ao mes de decembro. A sesión contou coa totalidade de membros da Corporación (17) ata a votación do punto número 3 da orde do día no que os cinco concelleiros do Partido Popular abandonaron o pleno. A sesión pode visualizarse íntegra a través da canle de YouTube. A xornada de traballo saldouse entre outros acordos coa renovación do acordo de integración das Bibliotecas Públicas de Boiro na Rede de Bibliotecas Públicas de Galicia, ou a prolongación da construción de máis carrís de bicicletas, con medidas concretas para seguir favorecendo dende o Concello a mobilidade sostíbel.
As votacións quedaron deste xeito:
1. Aprobación da acta da sesión anterior – aprobación por unanimidade (17 votos a favor).
2. Convenio de colaboración entre a Consellería de Cultura, Lingua e Xuventude da Xunta de Galicia e o Concello de Boiro para a renovación do compromiso de integración na Rede de Bibliotecas Públicas de Galicia das Bibliotecas Públicas Municipais de Boiro – aprobación por unanimidade (17 votos a favor).
3. Ratificación da remisión ao TACGAL do expediente e da proposta de informe da alcaldía de oposición ante os recursos especiais en materia de contratación presentados pola Asociación ASADE e o Sindicato CCOO contra o expediente de contratación do Servizo de Axuda no Fogar (SAF) do Concello de Boiro – aprobación por 9 votos a favor (PSOE) e 3 votos en contra (BNG e Boiro Novo). Os 5 concelleiros do PP abandonaron o pleno logo do debate do punto tres e antes da votación do mesmo.
4. Moción do grupo Boiro Novo relativa a retomar a construción de carrís bici e fomento da mobilidade sostible – aprobación con 10 votos a favor (PSOE + Boiro Novo) e 2 abstencións (BNG).
