O Concello de Muros lanzou o primeiro vídeo da campaña Muros Consciente 2024.
“Con este traballo, pretendemos abrir unha vía de reflexión sobre o cambio cara uns hábitos de vida sostíbeis e unha economía e consumo responsables”, asegurou a alcaldesa, María Lago, con motivo do lanzamento.
O vídeo foi realizado por Anxo Beiro, coa colaboración de María Candamo e Alba Figueroa, sendo protagonistas as alumnas e alumnos do CEIP de Louro, que achegan á Rede a súa particular visión nunha mensaxe chea de forza.
Dende Muros Consciente indican que nos vindeiros días irán chegando novas mensaxes para contribuír a un consumo respectuoso co medio ambiente e sustentábel. De feito, o gran obxectivo da iniciativa é “concienciar sobre a necesidade dun consumo sostíbel, ademais de apoiar ao comercio local a loitar contra as prácticas consumistas desta época nas grandes superficies”.
A campaña, promovida polo Concello de Muros coa dirección creativa do Espazo a Maceta, céntrase este ano nas estratexias de economía circular, enfocadas na xestión e redución de residuos na hostalaría local.
Porén, Muros Consciente involucra a todo o concello, levando a cabo actividades como un museo en baixos sen alugar; obradoiros nos centros educativos e coa hostalaría; roteiros pola vila; actividades de lecer como o ioga; presentacións de proxectos inspiradores, e unha gala que está prevista para o vindeiro 29 de novembro, onde se reunirán varias asociacións para celebrar os beneficios que traen ao pobo co seu traballo.
