O desgaste e a idade, sumado a hábitos como o uso de dispositivos, fan que a nosa vista se vaia deteriorando e lles botamos a culpa aos libros por esluír as letras, aos prospectos dos medicamentos por viren con indicacións cada vez máis miúdas, e ás cousas que nos caen ao chan por esa tendencia que teñen de escapar das nosas mans cando queremos collelas…
Pero non, o problema está nos nosos ollos e podemos facer varias cousas para emendalo ou corrixilo, como poñer unhas lentes ou, tamén, afastarnos dos obxectos e das persoas para velos mellor. Cos sitios que nos rodean pásanos o mesmo e é moi recomendábel irse aos horizontes para contemplalos, non só para desfrutalos, perdernos en ensoñacións ou simplemente estar nas verzas, senón tamén por que é bo para a saúde ocular. Esta foto de Palmeira que compartiu con nós Fran D. é a nosa terapia visual deste 2 de outubro. Como dicía o filósofo, se xa non es quen de valorar as cousas que te rodean, move as alas e alza o voo.
