O alcalde rianxeiro Julián Bustelo recibiu este 12 de xullo, no Salón de Plenos do Concello de Rianxo, os nove nenos e nenas saharauís acollidos por familias rianxeiras no marco do programa Vacacións en Paz promovido por SOGAPS: Solidariedade Galega co Pobo Saharauí, un programa que permite que estes nenos e nenas pasen o verán afastados das temperaturas que nestes meses se acadan nos campos de refuxiados do deserto.
O Concello de Rianxo colabora con este programa solidario sufragando parte do gasto das viaxes e facilitando a participación dos nenos e nenas no Campamento Concilia Verán 2024.
No acto tamén participou o director da Piscina Municipal, dado que durante a súa estadía no municipio os nenos e nenas poderán facer uso gratuíto da instalación e participar nun dos cursos que promove.
