Dende os anos 50 so pasado século teño consciencia da presencia cotián de golfiños na ría de Arousa.
Visibles perfectamente dende calquera punto de Ribeira, A Pobra, Boiro e Rianxo, tamén os habitantes da outra banda da mesma ría desfrutaban desa maxestosa “navegación” de familias enteiras de mamíferos mariños cuxa presencia na Arousa non sempre foi ben acollida polos mariñeiros debido a que, segundo teño escoitado a dorneiros e racús, a máis de espantar peixes como o trancho, a sardiña e moitas outras especies, comían delas ata fartar, o que repercutía negativamente na pesca.
Pois ben, a Unión Internacional para a Conservación da Natureza (IUCN) -considerada a rede ambiental máis grande do mundo- ven de recoñecer oficialmente as rías como unha área importante de conservación para mamíferos mariños. Por este motivo, a costa galega pasa a formar parte da Rede Global de Áreas Importantes de Mamíferos Mariños (IMMA, polas súas siglas en inglés) feito que implica o seu valor para a poboación dos cetáceos que viven nela, como as candorcas e varias especies de golfiños e baleas.
Con este recoñecemento téntase atraer a atención dos responsables políticos para a toma de decisións coa fin de garantir a conservación destes animais en Galicia mediante medidas de xestión máis axeitadas.
A relevancia ecolóxica para a conservación dos golfiños de nariz de botella comúns (Tursiops Truncatus) queda exposta na plataforma xa citada, que concede a categoría IMMA ás rías galegas. Este tipo de golfiño común nas rías con “fortes asociacións de grupos, agregacións inusualmente grandes e patróns estacionais que reflicten a dependencia das poboacións dos hábitats únicos proporcionados por estas enseadas e baías costeiras”, cos golfiños recentemente nados e as femias lactantes, atopan no ecosistema da rías un lugar perfecto para vivir, grazas ás zonas de alimentación produtivas ao longo de todo o ano.
Dende o Instituto de Investigación do Delfín Mular (BDRI), o ano pasado un grupo de expertos estudou as áreas importantes de conservación para o Océano Atlántico. Os seus estudos contribuíron á designación do IMMA ao longo de toda a Península Ibérica , o que implica o recoñecemento da biodiversidade por algunhas características particulares.
Unha destas características recoñece que as rías galegas máis grandes -incluídas as de Arousa, Vigo, Pontevedra e Ares-Betanzos- son lugares clave para estas especies de cetáceos mariños, cun avistamento promedio na Ría de Arousa de 1,4 por hora.
Dende o BDRI apuntan as particularidades destes golfiños como parte integrante das nosas rías. Xa en enciclopedias de 1.700 aparece a súa relevancia. A declaración está avaliada por científicos que dan importancia ás rías galegas, o que reforza a idea da necesidade de protexer a biodiversidade.