No marco do Ciclo de Cinema Mestre Mateo organizado nos concellos pola Academia Galega de Audiovisual, o Centro Social de Boiro vai acoller este domingo 15 de novembro, a partir das 19.00 horas, a proxección dun dos grandes éxitos do cinema galego recente, As liñas discontinuas.
Trátase dun filme galego de drama e romance dirixido por Anxos Fazáns, estreado nos cinemas en febreiro de 2026. A historia parte dunha noticia real sobre un ladrón que quedou durmido na casa á que entrou a roubar.
Sinopse
Bea é unha produtora musical de 50 anos que atravesa un proceso de divorcio. O día no que ten que abandonar a vivenda na que pasou as últimas dúas décadas, atopa o piso revolto e a un dos ladróns durmindo na súa cama.
O rapaz chámase Denís, un mozo trans de 28 anos que sofre a precariedade laboral malia ter estudos universitarios. En lugar de chamar á policía, Bea decide falar con el e ambos acaban pasando tres días xuntos antes de retomaren os seus respectivos camiños.
