No marco do festival Jazz Noia 2026, o Coliseo Noela vai acoller este sábado 15 de agosto unha clase maxistral con Steve Brown. Será, en palabras do Concello, unha boa oportunidade para “achegarnos ao jazz dende dentro”. A sesión desenvolverase baixo o epígrafe Jazz Fundamental e xirará arredor dos fundamentos do jazz. Trátase dunha masterclass pensada para todos os públicos, sen necesidade de coñecementos previos. A través dela a organización do festival quere brindar á cidadanía “unha oportunidade diferente para aprender, escoitar e descubrir algunhas das claves deste xénero antes de continuar gozando do festival”. Será o 15 de agosto a partir das 13.00 horas.
Steve Brown é un guitarrista, compositor e pedagogo de jazz norteamericano, moi coñecido en Galicia por liderar o proxecto transatlántico Atlantic Bridge Jazz Project xunto a músicos locais como Alberto Conde e Kin García. Foi fundador e director do programa de estudos de jazz no Ithaca College durante catro décadas. Fíxoo en 1968 e como unha forma de loitar contra o conservadorismo da época que prohibía tocar jazz nos pianos da facultade. Dirixiu o programa con éxito durante 40 anos ata a súa xubilación en 2008.
Ao longo da súa vida compartiu escenario e gravou con xigantes absolutos do xénero como Chuck Mangione, Jimmy Smith, Barry Harris, Ray Charles e Paquito D’Rivera.
